أتصل بنا
الرئيسية > كتاب اللواء > ياسيسى الحل هو التمثيل الضوئى
إعلان

ياسيسى الحل هو التمثيل الضوئى

د . زكريا مطر*
السيسى فارسنى ومخلينى الف حوالين نفسى اولا وشه مكشوف ومابيتكسفش ورغم خيباته التقيلة وفناكيشه الطايشة برضه بيلم الشلة بتاعته ويخطب فيهم كلام عجيب ومستفز والنهاردة فوجئت بخطاب طز فش منه وهو مش عارف ايه بيفتتح مشاريع الجيش واللى كنت اتمنى ان تكون صناعات عسكرية استراتيجيةكالطيارات والدبابات وحاملات الطائرات واقمار صناعية ولكنها كانت مشاريع مهلبية السيسى بيقول لازم احنا ان شالله ماناكلش ونبقى ونبنى بلدنا وبيقول ان احنا عايزين نضغط على نفسنا اكثر وان هو ماعندوش خيار غير كده ان احنا نضغط على نفسينا ونبنى بلدنا *وفى الحقيقة انا زهلت وفكرت وقلت طيب هو قال ماناكلش وقال نضغط علو نفسينا اكتر بس فريد عصره واوانه ماقالش ازاى ماناكلش ونعيش ومين اللى حاينضغط عليه تانى *ياسادة من مواطنى الشعب التانى اللى حاينضغط عليه طبعا لانه مش حايقدر يضغط على الشعب الاولانى اللى هما العسكر ومشاريعهم الاقتصادية والشرطة والقضاء الشامخ والنيابة وسما المضرى وصافيناز والفنانين والفتانين والبلطجية والاونطجية والمطبلاتية وفرق دقى يامزيكة ورجال اعمال المال الحرام وشعب تواضروس ومشيخة الازهر والامنجية وبتوع السبوبة وهلم جرا خاصة وان هذا الشعب المسكبن اللى هو الاولانى خسر فى مرة واحدة رسول من الرسولين بتوعه والتانى على كف عفريت الله يكون فى عونهم ويعينهم على ماحدث من تسريبات وماترتب عليها من تغير امزجة الكفيل الخليجى بعد مااكتشفوا انهم لبسوا العمة وخدوا حقن هوا واشتروا العتبة وعبوا الشمس فى قزايز ماطولش عليكوا نيجى بقى للشعب التانى الملطشة والارهابى واللى السيسى شغال عليه ياولداه ونازل فيه قتل واعتقال ومحاكمات يبدع فيها القضاء الشامخ بتسجيل ارقام قياسية يستعد بيها للدخول فى موسوعة جينس وتمثل ذلك فى تبرئة مبارك وجماعته كلهم دون استثناء وبهدلة كل من يعارض الانقلاب باحكام سريعة كلمح البصر من اعدامات واحكام بالسجن المشدد والمحاكمات العسكرية واحكام بمصادرة الاموال وحرق بيوت المعارضين *وطبعا الشعب التانى الملطشة شاف الويل و ضلام الليل من انقطاع الكهرباء لان السيسى بيدى 5 الاف ميجاوات للمناضل الليبى حفتر تعادل انتاج 5 محطات كهرباء حرارية تكلفنا اكثر من 20 مليار جنيه سنويا وده برضه علشان محاربة الارهاب ابن ستين كلب اللى مغلب السيسى وبسبب محاربة الارهاب والارهابيين الكلاب زاد سعر الغاز والكهرباء والماء والغذاء والكساء وضاع الامن والاستقرار واصبح القتل على الهوية ودون محاسبة والتصفية الجسدية بمجرد الاشتباه واللى تتسرق عربيته اوتكتكه يشخلل علشان يلاقيها واصبح الحل المتاح للشعب التانى اما الهروب فى قوارب الموت او الانتحار بالطريقة التى تعجبه وهو الاختيار الوحيد الذى منحه السيسى للشعب التانى منحة مشيرية منه *انا بقى ضاعت ولاقيتها واهدى للزعيم الكبير السيسى الحل اللى عجز عن الوصول اليه زويل المتلون وفاروق الباز المتحول والاقتصاديين الشيوعيين اللى اختفوا مش عارف فين ومش عايز منه حاجة احسن مسكين مابقاش عنده حاجة غير الربعمائة مليار جنيه اللى لهفهم من الخلايجة وخباهم فى مغارة على بابا اللى بتحرسها ميليشيات سويرس وفرسان مالطة *الحل هو ان يعمل المصريين عمليةالتمثيل الضوئى وده مش حايكلف السيسى حاجة لان ثانى اكسيد الكربون ماشاء الله زايد فى مصر اللى نسبة التلوث فيها عشرين مرة ضعف المعدلات العالمية واهو رب ضارة نافعة لان قيام الشعب المصرى بعملية التمثيل الضوئى بدل الاكل حايستهلك ثانى اكسيد الكربون الملوث للبيئة ويفيد البيئة وضوء الشمس متوفر طول السنة ومابيختفيش الا بسبب السحابة السودا اللى قارفانا ومش لاقيين لها حل بس للاسف المياه مش حاتكون متوفرة لان اثيوبيا عملت اللى عايزاه وحاتبنى السد حسب مواصفاتها ومش حايوصلنا ثلث حصتنا من المياه والسيسى ماطلعش دكر واستخبى وبتوع مسافة السكة ماشوفناهمش لانهم ياولداه مشغولين بتقتيل الشعب التانى الارهابى المقرف *ولان السيسى ماعندهوش خيار ولا فقوس غير الضغط على اكتر على الشعب التانى الارهابى اقترح عليه بانه يحطهم فوق بعض فى النيل بعض مايفضى من المياه اللى مش حاتيجى من اثيوبيا تانى ويضغط على اللى جاب ابوهم علشان يبنى ماسر ويعمل تاريخ واهى تضاف الى انجازاته وتوفر عليه جكاية تحديد النسل اللى عايز يعملها ويخلص من وجع الدماغ وزحمة الشوارع وازمة السكن وفاتورة الاستيراد ويعيش فى تبات ونبات وهو وشعبه المختار يخلفوا ولاد وبنات
 * كاتب عربى من مصر

تمت القراءة 705مرة

عن د . زكريا مطر

د . زكريا مطر

اضف رد

لن يتم نشر البريد الإلكتروني . الحقول المطلوبة مشار لها بـ *

*

إعلان
إلى الأعلى
Optimization WordPress Plugins & Solutions by W3 EDGE