الرئيسية > كتاب اللواء > الحل السحري لمجزرة الاستاد
إعلان

الحل السحري لمجزرة الاستاد

 

م/ محمود فوزي 

حوار تخيلي بين مواطن مصري عادي و صديقه ضابط الشرطه (الباشا) وهم قاعدين على قهوه

 

المواطن: شفت الناس اللى ماتت فى الماتش

الباشا : الله يرحمهم

 

المواطن: ايه المفروض يحصل . صورتكم بقت وحشه قوي

الباشا (وهو يضحك): ولا وحشه ولا حاجه ياراجل . ايه الكلام الكبير ده
انت عارف حل المشكله دي بسيط جدا

 

المواطن (بتساؤل) : ايه هاتعملوا ايه؟

الباشا (وهو يضع رجل على رجل) : دي حلها بسيط

بوكيه ورد و ( احنا وحشين) وتخلص الحكايه

 

المواطن (بصوت شفيق) : ايه

 

الباشا (يضحك بصت عالى) : لالالا – مش دي – معلش ماخدتش بالى

ياسيدي أخرها هايطلع الوزير يقول انا لن اتهاون مع اى ضابط لو ثبتت مسئوليته

 

الباشا يحرك اصبعه امام صديقه ويقول بخبث : واخد بالك من (لو ثبتت مسئوليته)

وبعدين اتعدل تاني وهو يكمل : وكمان يعني هانعاقب ناس بتواجه الارهاب بصدورها عشان حاجه وعشرين واحد

 

المواطن في حاله ازبهلال : حاجه وايه؟

الباشا (وهو يشد نفس من الشيشه) : ايوه اللى ماتوا امبارح دول فى الماتش

وبعدين دول اخوان أصلا

 

المواطن (يهز رأسه بحاول يفهم) : اخوان ازاي دول بتوع الالتراس ورايحين الماتش

وبعدين سمعنا ان الشرطه كانوا حاشرين الناس فى بوابه ضيقه جدا وقفلوا الابواب وضربوهم بالقنابل المسيله للدموع وفيه ناس بتقول ضربوا خرطوش

 

الباشا بيقاطعه بغضب : لا مضربوش خرطوش

ثم هدأ وهو يكمل: وبعدين قنابل غاز ايه بس يا راجل

 

وأشار الى الشيشه وهو يضحك: يا راجل ده قنابل الغاز أخف من حجر الشيشه اللى بنشربه ده.

 

المواطن ( وهو مش فاهم) : يا سلام . طيب مين المسئول ؟

الباشا : ما انا قلت لك الاخوان الارهابيين

وانت اصلا قلقان ليه طيب ما النائب العام بيحقق مع المتهمين فى القضيه

 

المواطن وبدأ الارتياح على وجهه : حقيقي؟؟

الباشا : طبعا ده بيحقق دلوقتى مع بتوع الالتراس

 

المواطن (تقريبا المراره باظت خالص) فقام وهو ينادي على صبي القهوة وقال : معلش ياباشا انا اتاخرت وانت عارف ورايا شغل الصبح

 

وسأل الصبي على الحساب واعطاه المبلغ

الباشا : بتعمل ايه بس – الحساب عندي ياصاحبي

 

المواطن : لا ازاي بس

وبعدين واصل بصوت منخفض : ده انتم ارهابيين

 

الباشا ينظر له متسائلا: بتقول حاجه؟

المواطن : لا مفيش – باقول الاخوان ارهابيين

 

الباشا وهو يبتسم: شفت بأه احنا بنحميكم من الارهابيين

 

المواطن وهو يسلم عليه : سحيح سحيح

سلام ياباشا

……………….

 

تمت القراءة 526مرة

عن م . محمود فوزي

م . محمود فوزي

اضف رد

لن يتم نشر البريد الإلكتروني . الحقول المطلوبة مشار لها بـ *

*

إعلان
إلى الأعلى
Optimization WordPress Plugins & Solutions by W3 EDGE